Paratoi

Mae arnoch angen gwaith papur i ddangos bod gennych chi’r canlynol:

• Pwyllgor (y grŵp o bobl sy'n gwneud penderfyniadau ar gyfer eich grŵp)
• Cyfrif banc
• Datganiad o gyfrifon ar gyfer y flwyddyn ddiwethaf (oni bai eich bod yn grŵp newydd)
• Dogfen lywodraethu (sef ychydig o fanylion ysgrifenedig am eich grŵp, sy’n dweud sut mae’n cael ei redeg)

Efallai hefyd y bydd arnoch angen gwaith papur i ddangos y canlynol:

• Yswiriant
• Polisi iechyd a diogelwch a / neu asesiadau risg
• Polisi cyfleoedd cyfartal (mae polisi yn gyfres ysgrifenedig o ganllawiau rydych yn eu dilyn)
• Polisi amddiffyn neu ddiogelu plant

Gweithiwch gyda'ch grŵp cyfan. Atebwch y cwestiynau allweddol hyn:

• Beth ydych chi eisiau ei wneud? Oes gennych chi'r bobl i'w redeg?
• Faint fydd yn ei gostio? (Peidiwch â dyfalu. Mae angen i chi wneud rhywfaint o ymchwil. Ac mae'n rhaid iddo fod yn gost-effeithiol, sy'n golygu nad ydych yn gwastraffu arian.)
• Pam fod y gwaith hwn yn bwysig? Pwy neu beth sydd ei angen?
• Sut byddwch chi'n gwybod a ydych chi'n gwneud gwaith da? Sut byddwch chi'n gwybod a yw'ch syniad wedi llwyddo?
• Pa mor aml fydd yn digwydd, a pha mor hir y bydd yn para?
• Ble bydd yn digwydd? Oes gennych chi ganiatâd ac yswiriant?

Meddyliwch am arian. Bydd angen i chi lunio cyllideb fanwl. Awgrymiadau:

• Rhestrwch bopeth y byddwch yn talu amdano a faint fydd yn ei gostio
• Rhestrwch yr holl incwm rydych yn ei ddisgwyl (er enghraifft ffioedd aelodaeth, rhoddion, grantiau sydd gennych eisoes)
• Rhaid cael dyfynbrisiau am bopeth y bydd angen i chi dalu amdano
• Peidiwch â thanamcangyfrif! Byddwch yn realistig
• Gallai fod yn ddefnyddiol i chi baratoi cyllideb ar gyfer y flwyddyn gyfan

Dod o hyd i gyllidwr

I ddechrau, mae angen i chi fod yn glir ynghylch canlyniadau eich prosiect. Mae gan wahanol gyllidwyr wahanol flaenoriaethau, ac mae hyn yn golygu y byddant yn ariannu eich prosiect dim ond os oes gennych yr un nodau ag sydd ganddynt hwy. Mae cyllidwyr angen bod yn siŵr y bydd eich prosiect yn gwneud gwahaniaeth gwirioneddol. Nid ydynt eisiau gwastraffu arian. Rhaid i chi gael tystiolaeth i ddangos bod eich prosiect yn bwysig. Gallwch wneud hyn mewn sawl ffordd:

• Gallwch ofyn i bobl sy'n cymryd rhan a chofnodi eu hatebion. Defnyddiwch eu dyfyniadau.
• Gallwch ddefnyddio gwybodaeth ystadegol (ffeithiau a rhifau). Dechreuwch gyda gwefannau eich cyngor lleol, yr awdurdod lleol, yr heddlu neu awdurdodau iechyd. Defnyddiwch ffynonellau dibynadwy fel adroddiadau'r Llywodraeth.
• Gallwch ddefnyddio llythyrau cefnogi gan grwpiau eraill, cynghorwyr lleol, yr heddlu ac ysgolion.
• Gallwch ddangos bod gennych gysylltiad â strategaethau lleol a rhanbarthol neu brosiectau'r llywodraeth.

Bydd angen i chi brofi i’ch cyllidwr y byddwch yn llwyddiannus. Mae hyn yn golygu bod angen i chi ddangos bod gennych enw da. Gallech chi ddangos hyn gyda’r canlynol:

• Proffiliau o'r bobl yn eich grŵp a fydd yn cymryd rhan, sy'n dangos eu cymwysterau a'u profiad
• Astudiaethau achos o brosiectau tebyg y mae eich grŵp wedi'u cynnal
• Tystiolaeth o gefnogaeth gan grwpiau neu sefydliadau lleol eraill

Ysgrifennu eich cais

Pan fydd gennych syniad da o'ch prosiect a'ch canlyniadau, gallwch ysgrifennu eich cais. Ond cofiwch:

• Peidiwch â chymryd yn ganiataol bod y cyllidwr yn gwybod unrhyw beth, felly peidiwch â defnyddio jargon a gwnewch yn siŵr bod popeth yn glir iawn
• Astudiwch yr hyn y mae'r cyllidwr ei eisiau, a gwnewch yn siŵr eich bod yn defnyddio ei eiriau allweddol yn eich cais
• Atebwch y cwestiynau a pheidiwch â malu awyr
• Byddwch yn gadarnhaol ac yn gadarn – mae “byddwn” yn well na “byddwn yn ceisio”
• Gwnewch y cais yn hawdd ei ddarllen gyda phenawdau a phwyntiau bwled clir
• Gofynnwch i rywun arall ei brawfddarllen

Mae cymdeithasau tai ledled y DU yn cyllido prosiectau lleol yn aml

Mae gan fanciau mawr i gyd gronfeydd amrywiol ar gael ar gyfer prosiectau lleol a chenedlaethol

Gallai cyllido torfol fod yn ddewis ar gyfer prosiectau llai hefyd

Am wybodaeth fanylach, edrychwch ar:

Canllaw y Ffederasiwn Cenedlaethol o Barciau a Gofod Gwyrdd, tudalennau 9 i 12

Mae gan y Cyngor Cenedlaethol ar gyfer Mudiadau Gwirfoddol lawer o help. Ewch yma am chwe erthygl am grantiau.

Am gyngor am gynllun busnes, a rhai templedi i’w lawrlwytho, edrychwch yma.

Ac mae sut i egluro pam mae eich prosiect yn bwysig ar gael yma.