Dechreuwch gydag asesiad risg – edrychwch ar ein canllaw cysylltiedig am hynny isod. Efallai y bydd arnoch angen yswiriant atebolrwydd cyhoeddus neu yswiriant arall. Edrychwch ar ein canllaw cysylltiedig isod am ragor o wybodaeth.

Gallwch ddefnyddio arwyddion rhybudd ond cofiwch ddau beth:

• Efallai na fydd plant yn eu deall. Gallant hefyd fod yn aneglur i bobl sydd â lefelau llythrennedd gwahanol neu sydd ddim yn siarad Saesneg.
• Nid yw arwydd yn golygu nad ydych yn atebol (ddim yn gyfrifol) os bydd rhywun yn cael ei anafu. Nid oes gan yr arwyddion hyn unrhyw statws cyfreithiol ac ni fyddant yn golygu nad oes gennych gyfrifoldeb os mai chi sydd ar fai.

Eich atebolrwydd (cyfrifoldeb) i'r cyhoedd

Oni bai eich bod yn mynd ati i greu risg, neu os ydych chi’n ddi-hid ynghylch a oes risg yn cael ei chreu, nid ydych yn atebol am unrhyw anaf a achosir gan:

• unrhyw nodwedd naturiol o’r dirwedd gan gynnwys unrhyw goeden, llwyn, planhigyn, afon neu nant
• unrhyw ffos neu bwll, boed yn naturiol ai peidio
• pobl yn pasio dros, o dan neu drwy wal, ffens neu giât, ac eithrio os ydynt yn gwneud defnydd priodol o giât neu gamfa

Daw hyn o ganllawiau ar-lein Llywodraeth y DU yma.

Ond mae gennych chi 'ddyletswydd o ofal' sy'n golygu bod rhaid i chi ofalu am unrhyw un sy'n dod i'r safle ac o fewn ei ffiniau, gan gynnwys staff, gwirfoddolwyr, aelodau'r cyhoedd, ymwelwyr a hyd yn oed tresmaswyr.

Edrychwch ar Ddeddf Atebolrwydd Preswylwyr 1957, a ddiwygiwyd yn 2005, i ddarllen y gyfraith swyddogol.

Yn sylfaenol, mae angen i chi gynnal asesiad risg a gwneud yn siŵr bod popeth mor ddiogel ag y gall fod.

Os ydych chi'n defnyddio cemegau niweidiol fel chwynladdwyr, rhaid i chi ofalu nad oes unrhyw un yn cael ei niweidio. Ond mae’n well fyth os gallwch chi leihau neu roi'r gorau i ddefnyddio pryfladdwyr, chwynladdwyr a phlaladdwyr yn llwyr. Edrychwch ar ein canllaw cysylltiedig ni isod ynglŷn â gweithredu dros bryfed.

Mae pyllau yn wych ar gyfer bywyd gwyllt. Ond mae rhai grwpiau cymunedol yn poeni y byddan nhw'n mynd i drafferthion os bydd rhywun yn cael ei anafu, neu waeth. Mae gan y Ffederasiwn o Ffermydd a Gerddi Dinesig lawer o gyngor manwl yma am byllau, a sut gallwch chi gael pwll heb unrhyw broblemau.

Mae hwn yn bwnc cymhleth iawn ac mae pob grŵp a phrosiect cymunedol ychydig yn wahanol. Felly cofiwch y pwyntiau allweddol yma:

• Ewch ati i gynnal asesiadau risg, a'u hadolygu'n rheolaidd.
• GWEITHREDWCH ar ganlyniadau eich asesiad risg! Rhowch fesurau rheoli ar waith.
• Peidiwch â chymryd yn ganiataol bod codi arwydd yn golygu eich bod chi’n rhydd i wneud unrhyw beth yr hoffech chi. MAE’N RHAID i chi wneud yr ardal mor ddiogel ag y gall fod.
• Holwch am gyngor am ddim gan y Sefydliad Cyfraith Amgylcheddol yma.
• Gwnewch yn siŵr bod gennych chi yswiriant addas.
• Ond peidiwch â gadael i ofni cael eich erlyn eich atal chi rhag gwneud eich prosiectau. Ewch i ymweld â phrosiectau eraill a gofynnwch sut maen nhw'n ymdopi – fe fyddan nhw'n gallu eich helpu chi!